Баянхонгор аймгийн Бууцагаан сумын Баянбүрдний 4 дүгээр багийн малчин Сааралын Ганбат алтан төлийн эзэн боллоо. ХХААЯ, МҮОНР-гийн тэртээ 1961 оноос тасралтгүй 45 дэх жилдээ зохион байгуулж буй “Таван эрдэнэ” нэвтрүүлгийн нэрэмжит шагнал болох “Алтан төлийн эзэд” тодорлоо.
Тухайн жилдээ хамгийн олон төл хүлээн авсан, нутаг орондоо шинэ залуу малчин бэлтгэхэд анхаарсан, малчдыг ажлын байраар хангасан байдал, малынхаа ашиг шимийг боловсруулж зах зээлд гарган өрхийн үйлдвэрлэлээрээ бусдад үлгэр жишээ болохуйц ажилласан, малчдын бүлэг хоршоо, нөхөрлөл хамтын ажиллагаанд хэрхэн санаачилгатай ажилласан зэрэг үзүүлэлтийг нь салбарын яамнаас харгалзан“Алтан төл”-ийн эзнээр тодруулсан юм.